Tekst van de maond
februari 2009
Jannie Bakker-Rietman
Parkeren
Ek lope met nummer drie in de stad. Dat gebeurt niet zo vaeke meer: i'j ef ondertussen een aander um naost te lopen. Mær veurdat aa-w naor onze bestemmige toe kunnen muu-k nog even wat geld in de parkeermeter stoppen.
Oewel aa-k in een plaese wone woor as et 'betaeld parkeren' nog niet uut-evunden is, kan 'k, naor mien gevuul, altied wel redelijk met een parkeermeter overwæg. Ie kun d'r deurgaons, zij et soms wel met ienige muuite, ook alle informatie op vienden die aa-j neudig bin um oen tiedelijke parkeervergunnige te bemachtigen. Kwestie van de varifocale brille even op et puntien van de neuze zetten, drammerige wachters achter oe veur laoten gaon en dan rustig de tied nemen um al die börties op die automaat te lezen. Ek stelle mi'j aldus ræcht veur de parkeermeter op en beginne bovenan:
'Et parkeertarief veur maondag tot en met zaoterdag
van 8.00 uur tot 18.00 uur bedraegt 2 euro per uur."
Ek kieke op mien allozie. Et is now wonzedag en zowat 20.00 uur, dus dat.
"Ie muun et aovendtarief em", onderbrek nummer drie mien gedachtengaank.
Ja, zoværre waar ek ook. Zowat temeinsen.
'Et tarief veur maondag tot en met zaoterdag
van 18.00 uur tot 24.00 uur bedraegt 1 euro per uur.
Een aovendkaorte veur de iele periode kost.
"Een aovendkaorte is gekoper, kiek, die kost mær 2 euro!"
Ek bin gewend even de tied te nemen veur zo'n apparaat. Mær geduld ef nummer drie now ien-maol niet. Nooit ad ook, trouwens, mær dat besluut ek op dit moment even onvermeld te laoten um de sfeer niet te verpesten. Dus ael ek gedwee een twie-euro-munt teveurskien. De gleuve, woor zit de gleuve veur et geld. Rooie knoppe, blauwe knoppe, grune knoppe, gleuve veur de chipknip, skærmpien, nog meer informatieplaeties. Door is de ongeduldige vinger van nummer drie al. Zonder værder commentaar wes ie de muntgleuve an. Vergeef mi'j, i'j is mi'j al weer een slag veur! Ek wörre zenuwachtig van em! En now, wat now. Ek kieke op et skærmpien: 24.00 uur, stet er op. Dat is goed, dan maa-k ier de iele aovend staon. Mær oe krieg ek now et köörtien uut et apparaat? "Die knipperende knoppe, die muu-j em."
O ja, netuurlijk, de knipperende knoppe. Ek drukke op de knipperende knoppe en metiene begint et apparaat te rochelen en te kwalsteren en spi'jt dan et köörtien uut. Et is nog even purreken um et uut dat benauwde kleine vækkien te peuteren mær dan scoor ek toch mær mooi mien parkeerköörtien! Gauw even in de auto laegen.
De sleutels. Woor e-k now zo gauw die autosleutels elaoten. Niet in mien ræchterzak, niet in mien linkerzak. O, in mien tasse netuurlijk toen aa-k de pottemenee pakte! Tasse lös en groffelen dan mær tussen de oor-elestiekies van mien kleindochters, een gebreuken streng krallen, et programma van een kærstwijdige en werempel ook senior zien creditkaorte die as ie ef laoten blokkeren umdat ie esteulen was. Vanuut mien oogoeken zie 'k dat nummer drie emzelf ondertussen mær net-an kan bedwingen mi'j die tasse niet uut de aanden graaien. Wör ek kiepig of zo? Goed, ek bin gien achttiene meer, en ook gien twintig, mær ek kan nog internetten en mailen, ek kan digitale foto's maeken, ek kan met een magnetron overwæg en zelfs een sms-ien versturen, en aa-k een aovend de tied neme veur et instructiebukien dan leer ek ook nog wel oe as de dvd-recorder werkt! En dat köörtien aa-k uuteindelijk zelf ook wel uut die automaat ekregen, al ad et dan tien tel langer eduurd! Soms wo-k dat alle elektronica ies een paer a ond uutvöl. Gien mobielties meer, gien tomtoms, gien internet, neks! Dan zol die jonge generatie, inclusief nummer drie, d'r nog ies van staon te kieken wat wí'j, die geldverslindende babyboomers, allemaole wel niet kunnen: kaorte lezen, foutloze brieven skrieven, melk wærm maeken in een pænnegien op et stel.
Ek viene de sleutel in et veurvækkien van mien tasse en laege et köörtien in de auto. Dan klek ek, al meters van de auto verwijderd, alle portieren met íene soepele beweging van mien doem elektronisch op slot.
Ek kan et niet laoten doorbi'j nummer drie triomfantelijk an te kieken.
Naar het tekstenoverzicht
