Wi’j heurden van RTVOost et bericht dat de heer Arend ten Oever, veurzitter van de Nedersaksische koepel SONT* op 17 juni plotseling overleden is. Ten Oever was van 2001 tot 2006 burgemeester van Ommen. Eerder was hi’j burgemeester van Ni’jluzen.
In de periode 2002 tot 2010 was Ten Oever lid van et bestuur van de IJsselacademie. Hi’j toonde him in die tied, en ok daornao, altied betrokken bi’j et wel en wee van oonze stichting en zette him der ok veur in.

Zien passie lag veural bi’j et Nedersaksisch. Et was dan ok niet vremd dat hi’j veurzitter van SONT wodde, en dat hi’j in dat verbaand veurop gong in de stried veur de erkenning van et Nedersaksisch onder diel III van et Europese Haandvest van regionale taelen. Die stried is nog niet streden, en Ten Oever zal spietig genog niet meer mitmaeken hoe die oflopen zal.

Ok deur RTVDrenthe en Jan Germs van et Huus van de Taol wodde stillestaon bi'j dit gevulige verlies veur de streektael.

*Stichting  Streektaal-Organisatie in het Nedersaksisch Taalgebied