Gees Bartels gehuldigd

Op 27 mei kreeg Gees Bartels-Martens de Cultuurpries 2010 van et Prins Bernhard Cultuurfonds Overiessel. Zi’j kreeg de pries veur äär passie, inzet en creatieve inbreng veur o.a. de ‘Literaire Wandelingen’ in Overiessel en et project ‘Geen dag zonder gedicht’. Commissaris van de Koniginne mr. G.J. Jansen ef as veurzitter van et Prins Bernhard Cultuurfonds Overiessel äär de pries overandigd.

Tiedens de feestelijke aovend in Café Restaurant De Viersprong in Ni’jleusen waeren der optredens van 13 minder of meer bekende Overiesselse dichters. Ze lazen allemaole een gedicht. Die gedichten ad Gees Bartels elk op een prachtige kaerte laoten drukken, in een ontwärp van vörmgever Frank de Wit. De anwezigen kregen zo’n pakkettien van 14 gedichten (Gerrit Kraa ad ook een gedicht inelèverd maar kon der die aovend niet bi’j wèèn) onder de titel Dichter op de viersprong as andenken met.
As streektaaldichters uut de westelijke elfte van de provincie waeren Jannie Bakker uut Gællemuun en Klaas Würsten vertegenwoordigd. Wi’j bin bli’j dat zi’j toestemming gaven om de gedichten van die aovend èn van un kaerte as Tekst van de maond juni en juli te gebruken.

bruid

‘k eb oe etooid in dit bruselijk wit,
sierlijk de stof um oe middel eplooid
zörgzem eskekt en estreeld zoas ooit
luiers en romperties: witte cocon
woor aa-k oe, kostber, in koesteren kon

plots’ling ontpopt tot een poop’lende bruid
ontplooid now de vleugels van tule en kaant
trillend van ongeduld zie ’k oe door staon
op de raand van de toekomst, kloor um te gaon

vleeg’ as een vlinder
gien inder van weemoed
vlieg ie verliefd op oe bruidegom toe

‘k zie oe door zweven
umgeven deur ziede:
et leven zwiert even een polka met oe

Jannie Bakker