Algemeen
Lopend onderzuuk
Boeken die der an kommen
Cursussen
Lezingen
Erfgoededucatie
Streektaal in de zörg
Literaire wedstried
Literair digitaal tiedskrift
Zunnewendefestival Hellendoorn
Werkverband Dialekten
Advies


Algemeen
De streektaal is ’t sprèken en bewären weerd. Döör wärkt de Iesselacademie op de volgende meniere an.
o De streektaal wört beskreven in de grammaticareeks en in woordenboeken.
o Et skrieven van literair wärk wört estimuleerd, onder meer deur et organiseren van literaire wedstrieden.
o Literair wärk wört uut-egèven, of der wörren uutgèèfmeugelikeden ezöcht.
o ’t Gebruuk van de streektaal wört estimuleerd in meziek van disse tied en culturele manifestasies.
o Der wört onderzuuk edaon, en onderzuuk van anderen wört estimuleerd.
o Der wört tied in-eruumd om vraogen van bi’jv. skolieren en studenten over de streektaal te beantwoorden.
o Der wörren cursussen veur volwassenen ontwikkeld om de kennis van en over de streektaal over te dragen; de streekcultuur in bredere zin krig binnen de cursussen ook völle andacht.
o De streektaalconsulent ontwikkelt en ondersteunt (onderwies)projecten die gericht bint op ’t in lèvendig ollen van de regionale taal.
o Op verzuuk skrieven wi’j artikelen over verskillende aspekten van de streektaal, en ollen wi’j lèzings.
o De Iesselacademie ef een goed bruukbäre spelling ontwikkeld veur ’t skrieven in de regionale taal.

Lopend onderzuuk
o Grammatica: Het dialect van Hasselt. Klank- en vormleer. Uutvoerder: J.J. Spa. Wört ofrond 2011; resultaoten verskienen in boekvorm. Deel 7 in de Grammaticareeks van de Iesselacademie.
o Woordenboek: et Woordenboek van de Overijsselse Dialecten (ook bekend as ’t GOS-project): kiek bi’j et tabblad Overijssels woordenboek.
o Klankveranderingen binnen het Zwols (wärktitel). Uutvoerder: Ph. Bloemhoff-de Bruijn. 

Vrijwilligster Anneke van Dyk voert de gegevens in
van de vragenlijst over De Mens
foto Albert Bartelds

Boeken die der an kommen
De dialecten van centraal-Salland: Raalte, Heino en Lemelerveld.
Naodät in vief eerdere delen de taal van Wieje, Vollenhove, Ommen, Groot-Iesselmuden en Stienwiek en omgeving is vastelegd, zal in 2011 deel 6 in de Grammaticareeks van de Iesselacademie uutkommen: De dialecten van centraal-Salland: Raalte, Heino en Lemelerveld.
Et boek is eskröven deur taalkundige dr. J.J. Spa (emeritus oogleraar), die al drie eerdere delen van de reeks voor zien rekening nam. In dit boek gef Spa een zo volledig meugelijke beskrieving van de dialecten van Raalte, Eino en Lemelerveld, in drie verskillende eufdstukken.
Van alle drie de varianten van et Sallands wörren onder andere uutelegd en toe-elicht: de klanken, de uutspraakregels, et wärkwoordsysteem, de verkleinwoorden en de meervouden van de zelfstandige naamwoorden. An et ende van elk deel wörren ter illustrasie uutdrukkingen en een tekst in et betreffende dialect op-enömmen.
Met de beskrieving van et centraal-Sallands wört weer een belangriek deel an de beskrieving van de Overiesselse streektalen toe-evoegd.
Et boek zal belangriek wèèn veur de tegenwoordige en toekomstige generasies streektaalsprèkers, die betien bi’j betien de typische eigenöördigeden van de verskillende lokale talen kwietraken. Et zal gebruukt kunnen wörren as ge-eugensteuntien veur de streektaalsprèker van disse tied en as belangrieke bron veur ni’je bewoners die meer over de streek en de streektaal willen weten. Bi’j cursussen over streektaal en streekcultuur kan et as basis- en naoslagwärk gebruukt wörren.

Start: 2003
Ofronding: 2011
Contactpersoon: Philomène Bloemhoff; Dit e-mailadres is beschermd tegen spambots. U heeft JavaScript nodig om het te kunnen zien.

Cursussen










In 2011 zal ewärkt wörren an et cursuswärk in et wärkgebied van de IJsselacademie. Der mutten in meer dörpen en steden cursussen komen, op basis van een cursusboek dat in elke plase an-epast kan wörren. Intussen blef de Zwolse taal en cultuurcursus gewoon deurlopen.

Lezingen
Der kunnen deur onze medewärkers lezingen egèven wörren over verskillende onderwärpen:

1. Variatie binnen de taal van et wärkgebied
2. Streektaalmeziek
3. De taalkäärte van Overiessel
4.Streektaalliteratuur
In overleg kunnen de onderwärpen ok nog an-epast worren.

Erfgoededucatie
De Verandering. Project veur de basisskoele.
In samenwärking met de Twentse Welle, OBD, HCO, 't Oversticht en KCO is d'r een provinciebreed lesprogramma ontwikkeld op et gebied van ärfgoededukasie. Ier ef de streektaal ook een belangrieke plase in. Dit lespakket is via et KCO te kriegen: www.deveranderingvanoverijssel.nl/

Streektaal in de zörg
“A’j plat kunt praoten, mu-j ’t niet laoten!” is de titel van een onderzuuk nöör de meugelijke meerwäärde van et gebruuk van streektaal in de zörg (2005, IJsselacademie/Van Deinse Instituut/Universiteit Twente). Die meerwäärde bliekt der te wèèn. In zörginstellingen preberen verzörgers de kwaliteit van et contact met de cliënten steeds beter te maken. Et gebruuk van streektaal wärkt dan vake eel positief.
Völle olderen bint op-egruuid met de regionale taal en cultuur. Völle jongeren be-eersen die taal niet meer zo goed. Döörumme is et belangriek dat der op de zörgopleidingen andacht is veur de streektaal en de cultuur van de streek.
Met et lespakket ‘Streektaal in de zorg’, dat in 2010 epresenteerd wier, willen de Iesselacademie en opleidingsinstituut (ROC) Deltion College Zwolle de verzörgenden die de streektaal nog praoten, stimuleren om dat in un wärk ok echt te doen. Wie dat niet kan, wört in elk geval in contact ebracht mit de variaosie en de achtergronden van de streektaal. Ook de verskillen tussen dörps- en stadscultuur worren be-andeld.
Streektaal in de zorg is meugelik emaakt met steun van de Provincie Overiessel en de Iesselacademie (Kampen)

Meer informaosie: www.streektaalindezorg.nl, ook veur et lespakket:
Dit e-mailadres is beschermd tegen spambots. U heeft JavaScript nodig om het te kunnen zien. . Et is gratis veur studenten en wärkenden in de zörg; veur anderen € 12,50.
Download hier de   Flyer Streektaal in de Zorg . Grafisch ontwerp: ZinOntwerpers (Zwolle)

Literaire wedstried
De streektaalconsulent is in overleg umme samen met TwentseWelle en de Skrieversbond Overiessel een ni’je literaire wedstried te gaon ollen. Warskienlijk is de eerste editie in 2012.

Literair digitaal tiedskrift
De streektaalconsulent is betrökken bi’j de uutgave van et digitale literaire tiedskrift Van over de Iessel, een uutgave van de Skrieversbond Overiessel. Ie kunt oe gratis abonneren op www.vanoverdeiessel.nl.








Zunnewendefestival Hellendoorn
Op zaoterdag 18 juni a.s. wört veur de viefde keer ’t Zunnewendefestival e-organiseerd op Landgoed Schuilenburg, èven buten Heldern.
Op disse biezundere plekke an de Regge ku-j genieten van mooie meziek en verälen of gedichten. Dit alles wört edaon in de verskillende talen uut disse streek en wat värder weg. De streektaalconsulent zit in de organisasie en dut met an de programmering. Een festival wöör alle varianten van et Nedersaksisch an bod kunnen komen in meziek, poëzie en proza.
Kiek veur et programma van dit jöör: www.zunnewendefestival.nl.




































Zunnewende 2010   foto's Albert Bartelds

Werkverband Dialekten
De IJsselacademie ef al vanof et begin een wärkgroep van geïnteresseerden die zo'n vief keer per jöör bi'j mekäre kump.
D'r wört dan epraot over de verskillende streektalige aktiviteiten van iederiene, aover et mooie van en aover ampärtigeden binnen de verskillende dialecten, d'r wörren uutdrukkingen en gezegdes en andere wetenswäärdigeden verzameld, d'r wörren skriefopdrachten egèven etc.
Ok skrieven de leden van et wärkverband stukkies veur de Overijsselse spreukenkalender.
De leden van de groep kommen uut Kampen, Zwolle, Urk, Stappest, Wilsum, Heerde en Gællemuun.
Ni’je belangstellenden kunt zich anmelden bi’j Dit e-mailadres is beschermd tegen spambots. U heeft JavaScript nodig om het te kunnen zien. .











Advies
Met alle vraogen aover de streektaal (oe mu-k et skrieven? oe kan ik een boek uutgèven? wat betekent dät woord? oe zo-j dät in de streektaal zeggen mutten? wöör kump et Nedersaksisch weg? weet ie iemand die een aovend kan kommen verzörgen?) ku-j bi'j ons terechte, liefst via de email: Dit e-mailadres is beschermd tegen spambots. U heeft JavaScript nodig om het te kunnen zien. of Dit e-mailadres is beschermd tegen spambots. U heeft JavaScript nodig om het te kunnen zien. . Wi'j weten et antwoord of wi'j zuken et veur oe uut!

*Deel van het Werkverband:
vlnr: Jannie Bakker, Riek van der Wulp, Jan van Leeuwen, Albert Juffer, Han Mulderij.